Сайт с.Целегюн Магарамкентского района РД
Среда, 23.01.2019, 10:24
Меню сайта

Поиск

Вход на сайт

Календарь
«  Январь 2019  »
ПнВтСрЧтПтСбВс
 123456
78910111213
14151617181920
21222324252627
28293031

Архив записей

Мини-чат
300

Статистика

Вири санал: 1
Мугьманар: 1
Чкадал алайбур: 0

Друзья сайта

 

         Фейзудин Нагиев

Пагь, чи уьмуьр вуч я куьруь, вилер даим ахварава…
Вун женнетдин я хьи гьуьруь, аман, вахъ хуп1 гьунар ава!

Рагъ жумарт я, т1ебиатдиз гузва уьмуьр, гузва эрел. 
Чимдихъ муьхтеж тирла вири, ви къужахда нурар ава.

Гьар са гуьзел вичиз дигай яр хкягъиз жеда гара,
Гьар цуькведихъ вичиз дигай атир ава, рангар ава.

Шумалдин тан, камалдин сан, ви буй, ви суй аламат я!
Т1ебиатдиз дамах гъидай багълар, сувар, кhурар ава.

Жемир энгел, чубарук хьиз зи къужахдиз лув гана ша, 
Лув гун чна деврангагьдиз – чахъ ашкъидин лувар ава.

К1анивили дуьнйа хуьда писвилерин женгерикай, 
Т1ебиат тhам муьгьуьббат я, вичин чилер, цавар авай.

Ракъин нурдал шагьвар къугъваз, кеманчадин симинал хьиз,
Чи к1вачерик цуьквед гамар эк1ягъиз мерд гатфар ава.

Чуьлдин цуьквер ат1удач ваз – чуьллер, сувар вири ваз я;
Гьар цуькведа зи рик1ин сир, вахъди авур ялвар ава.

Вунни цуьк я – экуьн чиг хьиз, гьар пакамахъ зун къвада вал
Вун паталди Фейзудинан рик1е сирлу гафар ава.

2014.

                                                                                                         

Нажмудин Шихнабиев

 

                                                                                                  Метлеблу лекция
                                                                                                  (Сатирадин гьикая)
Райондай атай лектор машиндай лап гьа колхоздин контордин гурариз эвичIна. Председателди чIехи мугьман хушвилелди кьабулна.
-Лекция башламишдалди гьич тахьайтIа са сят вахт ама, вунни рекьи яна галатнава, юлдаш Семедов. Ша чна са тIимил фу-затI нен ва ял акъадарин, - теклифна гъилер ягъайдалай кьулухъ председатель Буржума.
- Пис меслят туш, - рази хьана лектор. – Идалай гъейри, лекция, бязибуру лугьузвайвал, кьиляй ваъ, . . . руфунай къвезвайди я эхир. АкI хьайила, галайвал руфуниз авуна кIанда.
Гьа икI лагьана, абур колхоздин счетоводни галаз складчи-дин кIвализ хъфена. Юлдаш Семедован руфун вилик шиш-кабабар къведа лугьуз шадвиляй гагь агъуз, гагь виниз симиналлай пагьливан хьиз хкаж жезвай, на лугьуди ада терекмедал кьуьл ийизва. Лугьумир хьи куьне, гьуьрметлу кIелзавайбур, гуя юлдаш Семедоваз икьван гагьди шиш-кабабар жагъайди туш. Ваъ, ваъ! Ада абур гзаф тIуьрди я, гьатта бязи вахтара бегьем кьурун тавур къахунин якIуз янавай буьтIруькриз уф гуз хъуьткъуьнайди я.
Амма и юкъуз адаз шиш – кабаб гьатнач… Я кас чун вилик вучиз катзава эхир, галай – галайвал лугьун кван.
Складчи Къадирбег мугьманрин вилик кьиф кьаз тахьана иесидин вилик тахсирлу яз хтанвай кац хьиз акъвазна.
- Куьне багъишламиша, гьуьрметлу мугьманар, - башламишна ада. - КIвале пабни авач, я гьазурнавай хуьрекни. Эгер квез геж жедачтIа за са кIел тукIван.
- Герек авач, геж жеда, - гаф атIана Буржума. – Тадиз агакьдай вуч аватIани гъваш. КIелез гвянай килигда.
Мад юлдаш Семедован гуьгьуьлар гьикI чIур хьанатIа лу-гьуникай файда авач - куьн гьакIани гъавурда акьазва. Эгер генани гъавурда гьат тийизвай кас аватIа, къуй ада вич юлдаш Семедован чкадал гьа ихьтин шартIара эциграй. Амма чи гьуьрметлу лектордин руфуникай лугьун тавуна жедач. Чатун целер хьиз хкаж жез ацукьиз кьуьлзавай адан руфун, хуьрек гьазур туш лагьайла, гьа са чкадал алкIана (гьа икI гзаф хкадарай къиб эхир уьлендин лил квай кьарадал экIя хьана алкIида). 
- 2 - 
- Мад за вуч ийин, мугьманар?! Инал са катулда авай ргай картуфар ала, - лагьана кIвалин иесиди. 
- Я гадаяр, - гьайифдивди лагьана лекторди, - картуфрихъ галаз эрекь кьадайди туш эхир. . .
- КIанзавайди руфуна чка хьун я, эрекьдихъ галаз кьан тийидай затI авани мегер! Ада къван цIурурда, къван! – сифтегьан тост лагьана счетоводди.
Маса чара амукь тавур мугьманди эрекь ргай картуфралди басмишна. Кьуд касди вад бутылкани са катулда авай картуфар чпин руфунриз авадарна. ЧIехи кьил лекциядилай гуьгъуьниз башламишдайвал тир. Юлдаш Семедов атайла хуьруьн клубда колхозникри чпин чкаяр кьунвай. Вичи хъванвайди чир тахьуй лугьуз, лектор гъвечIи камар къачуз, аста – аста суьрейрин арайрай трибунадиз хкаж хьана.
Кьилеллай шляпа хтIунна столдал эцигна, ада лекция кIелиз башламишна:
- Гьурметлу юлдашар. . . – кIевиз векъи ванцелди лагьана ада, амма юлдаш Семедова вичиз пис жезвайди гьисс авуна. Адаз клубда авай колхозчияр вилерикай къарагъзавай цеквер, тIветIвер, чепелукьар – куьрелди дуьньяда авай кьван вири куьлуь пипе – шипеяр хьиз аквазвай. Абурни юлдаш Семедовал акI алчуд жезвай хьи, адаз дуьнья дар, нефес залан хьана ва ада вичин сив муьхцуьн ракIар хьиз ахъайна, къанихдиз нефес чIугуна.
Са бубат регьят хьайила. ада вичи вичик фикирна: «Им вуч ятIани хъварс я. Эхь, эхь, гьам я зи туьд кьуна ахъай тийизвайди. Ахпа лугьудайла, хъварс авай затI туш лугьуз гьарайда».
Амма колхозчийри лектор рахан тийиз акурла къал къачуна. Юлдаш Семедова вичин туьтер уьгьуь – затI яна ачухарна ва мад сифте кьилелай башламиш хъувуна:
- Гьуьрметлу юлдаша. . а. . ар. . . – и сеферда адавай вичин руфуна къугъвазвай хъварс кьаз хьанач. . . Трибунадилай сифтегьан суьредив кьван сивяй цIил хьиз ягъай юлдаш Семедов сегьнеда столдихъ ацукьнавай председатель Буржумахъ элкъвена: 
- За ваз эрекьдихъ галаз картуфар кьадач лагьаначирни?!. . . 
- И ламран хцин невс зи гъиле авайни, - кушкушдалди лагьана Буржума счетоводдиз.
КIватI хьанвайбур вири чкIана, амма клубда са яшлу кас амай. Эхирдай гьамани къарагъна, амма ам явашдиз юлдаш Семедован патав атана. Гъиле кIекIецни авай итим къвез акурла лектор кьулухъ хьана.
- Сагърай, чан хва, - лагьана яшлу итимди. - Ихьтин метлеб квай лекция чи хуьре гьич садрани хьайиди туш. Зазни ван хьайиди тир, эрекьдихъ галаз картуфар кьадач лугьуз, зун чIалахъда акьазвачир. Амма къе вуна и кар субутарна, заз гила вилералди акуна. Тежриба гьахьтин затI я, хва. Иниз килигна тушни бес, чи бубайри япариз ван хьайидахъ ваъ, вилериз акурдахъ агъуна кIанда лугьузвайди.
Мад сеферда лекция кIелиз атайла, вун сифте зи кIвализ илифа. За ваз са литр эрекьни гьазурда ва са тини ишиндай куруна авай семенани. Акван, семенадихъ галаз эрекь кьадатIа килигин. . .
                                                                 

                                                                                              Сизифан азабар
                                                                                                        ( Юмор)

Дегь заманадин Коринфдин пачагь Сизиф гзаф амалдар ва гьарамзада кас ялдай. Лугьуда хьи, ада неинки инсанар, гьакI аллагьарни (дегь заманадин грекриз аллагьар гзаф авай) ва ажални кумаз алцурарнай. Сизиф кьейидалай кьулухъ, аллагьри ам жегьнемдиз ракъурна ва адаз куьтягь тежедай азаб гана:Сизифа дагъдин кукIвал къван акъудна кIанзавай, амма дагъдин гьа кукIвал агакьдайла, къван зарбдиз агъуз аватзавай. Хкетра лугьузвайвал, къени Сизиф къван ялиз азабрик кума.
Гьелбетда, а девиррин аллагьар зулумкарар я, лугьуда са бязибуру. Белки икI лугьудайбурни гьахъ я жеди, амма са бязи къенин йикъан инсанар…
Виридалайни хъсан кар галай – галайвал суьгьбет авун я. Де кIела, гьуьрметлу, Сизифан азабар и дуьньяда такур, я агъа дуьньяда кьисмет тежедай, малаикар.
ГьикI ятIани, заз тамай кIвализ кIарасар хкидай улакь герек хьана. Сизифан вахтар туш кьван, ламни къачуна, фин. Зунни совхоздин директор Къалабеган патав фена. ТIвар Къалабег ятIани, адаз вирида Ахпабег – Пакабег лугьуда, гуя директорди вичел гьалтай кар «ахпадал – пакадал» вегьедалда. Гатфарин гуьлуьшан вахт тир, директорни ачух пенжердин патав ацукьнавай ва вичини кьефесдавай билбилрин хуш нагъмайрикай лезет хкудзавай. Зи арзадиз са уьтери килигна, амма зун адаз акунатIа чидач. «Ахпа хъша», - лагьана, директорди вичин «жавабдар кIвалах» давамариз хьана.
Мад бюрократрикай гзаф кхьинарни авунва, амма абур, пипин кIарасда гьатдай куквар хьиз, терг жезвач. Чидач и куквариз гьихьтин агъу дарман жедатIа!
Лугьун хьи, анжах арзадал са къул чIугун патал заз пуд варз бес хьанач. Гагь машинар гад кIватIиз хьана, гагь тракторар цана хьана, гагьни абур чIуру яз акъвазарнавай. Эхирни са юкъуз директорди зи арзадал лап министрдин хьтин къул чIугуна.
Арзани гваз зун трактористрин бригадирдин патав ракъурна. Кьилин инженер ЧIулав гьуьлуьн къерехра кьил туькIуьриз авалдай. Бригадирди, адаз сабуру Шурик – Мурик, муькуьбуру Киса – Миса лугьузвай, заз бегьем жаваб ганач.
- АтIангье тракторар, ва а…а…тIангье трактористар, - тIуб туькIуьрна ада. – Рахух нихъ галаз кIантIани, твах вуж кIантIани.
За, гьелбетда, трактордин патахъай чекни къачунвай. Дуьм- дуьз цIемуьжуьд манат ганвай. Зун трактористар акъвазнавай патахъ фена. Гена и арада зун са танишди гъавурда туна.
- Абуруз лугьун гьакIан кар я, - лагьана ада заз чинеба. Аквар гьаларай и кас геж дуьньядиз акъатнавайбурукай тиртIани, фад дуьньядин гъавурда гьатнавайбурукай тир. – Садни къведач, эгер вуна чек къалурайтIа. Виридалай са гьал регьим авайди Булама я. Вуна Буламадиз лагь : гьуьндуьшкадин кIек квай хинкIарни гьазурда, са кьвед – пуд шуьше эрекьни, къад манат пулни гуда. Эхирдай чекни гвайди лагь.
- «Булама» вуч я? ТIвар яни? – жузуна за.
- Яда, ина садазни вичин тIвар кьуна эверзавайди туш. Садаз Макарон (ам яргъиди я), муькуьдаз Кьашкьа духтур (гачал я), пуд лагьайдаз Тарашка (яхунди я), кьуд лагьайдаз Спирмет (хъунал рикI алай Пирмет) ва икI мад. Булама а касдал эрекьдихъ галаз булама хъвайидалай кьулухъ акьалтайди я. Им вуч я, гьеле садан лакIаб Галантерея я, ада машиндин кабина туьквен хьиз туькIуьрнава. ИкI эверайлани, вичи лап дамахдивди «гьай» лугьуда.
Мад яргъияр тавуна, зунни Буламадин патав фена. Вири, жув гъавурда тунвайвал, лагьана.
- Эгь, дуст кас, зи трактордин кабинадин къавай тIили къвезва ман, тахьайтIа за ви кIарасар ширтна хкидай хьи, - гьайифдивди лагьана Буламади.
«ТIили атун, гьелбетда, хъсан кар туш. Къе рагъ ава, амма белки гьа тамуз фейила марф къвада жал», - фикирна за. Зунни, халис слесарь хьиз, кабинадин къавал хкаж хьана. Герек зарятарни жагъурна, за кабинадин къав «мерседесдин» лак янавай къавуз ухшарна.
- Лап хъсан, - рази хьана Буламани. – Гила фейитIани жеда, амма прицепдин хур са чкадилай патахъ хьанва.

За прицепдин хур хкудна, сварщикдив гьа чкани туькIуьруьз туна. Гила зун Буламадин куьмекчи глагол хьанвай. Ахпа за радиатор алудна, ам чатук паяльникдалди туькIуьр хъувуна. ЭрчIи патан цепь алудна, са башмакьни дегишарна. Чапла патан цепь тIарамарна. Ягъ михьдай фильтраяр цIийибур эцигна. Амма я гараждай, я складдай гар ядай цIапурар жагъанач. Югъни няни хьанвай.
Пакад юкъуз зун райцентрадиз фена. ЦIапурар жагъанач. Ина – ана суракьна, эхирни Манасдай гьатна. Дамахдивди за цIийи цIапурарни гьалдна.
- Лап хъсан, - разивална Буламади. – Гила фейитIани жеда тамуз, амма лентер авач эхир.
Мад вучда? Тормозар авачир трактор гваз физ жеч хьи. Мад гьатна зун суракьда. Дербент, Хачмас, Баку, Махачкъала тупIалай авуна, гьатнач лентер. Эхир зун Ростовдиз, дуь. .уьз «Россельхозтехникадиз» фена. Аман – минет, дад – бидад авуна, къачуна лентер.
Гила, гьакъикъатдани кIамайди кIарасар хкиз фин тир.
- Бес прицепдик квай чархар? – нарази хьана Булама. – Абурни куьгьнебур я.
Чархар за Кутаисидин заводдай гъана. Мад рехъ тахьуй лагьана, Еревандай генераторни къачуна. Бакудай хкведайла кабинада эцигун патал гагь чими ийидай, гагьни гьава къурдай кондиционерни гъана. Японский видеомагнитофонни къачуз кIанзавай, амма пул бес хьанач.
- Де хъсан, - пIузарриз мез гана Буламади. – Бес карбюратор?
Карбюратор акъудайдазни экъуьгъуьз, мад гьатна зун рекье. Дерди – бала ахъагъай сада заз лагьана: трактордал карбюратор жедайди туш. Гена зун Огнидай элкъвена гьа, тахьайтIа кIамаш Буламадин гафуниз килигна, лап гьа Москвада кьван физвай. . . 
ИчIи гъил хтун тахьуй лагьана, цIийи аккумуляторни къачуна.
Вири эцигна куьтягьна, амма Буламадин чин чIуру тир. Себеб? Себеб чи райондин туьквенрай хъвадайди куьтягь хьун тир. Икьван кIвалахар авурла, кьве шуьше эрекь тагъун дуьз туш эхир. Зун мад Бакудиз акъатна. Са сумка эрекьарни къачуна ( запасни хьуй), кьулухъ элкъвена. Амма рекье зун ОБХСС –ди кьуна, эрекьарни вахчуна, са гужбаладалди зун дустагъдикай хкатна.
ИчIи гъилди хтай захъ галаз Булама рахунни авунач…
Эхирни, чара атIай зун къунши хуьруьз фена. ЯхцIурни цIуд манат гана, лам къачуна. Ингье, зи кIарасарни гъенел хтана. Булама лагьайтIа, за «мерседес» хьиз туькIуьрай тракторда аваз, заз таварар гуз, зи гъенелай йикъа къадра агъуз – виниз физва.
Вахтар физва, вахтар дегиш жезва. Эгер дегь заманада аллагьар гзаф, Сизифар сад тиртIа, гила гена Сизифар гзаф я, аллагь – тек. 
Яраб, Булама, вун грекрин аллагьрин гъиле гьатнайтIа, ваз вуч жаза абуру гудайтIа?! Белки гъил ква хьайи чкадихъ агакь тийидай жаза гудайтIа? Я тахьайтIа, гьамишалугъ яз трактордин кабинада агална, Египетдин фараон хьиз, кьурурдайтIа?. .. 
Гьар гьикI хьайитIани, вун гьа грекрин аллагьрин гъиле гьатуй ман, Булама. Чи аллагьдивай ви дуван акваз жезвай хьтинди туш.
Яраб регьимлу Булама ихьтинди хьайила, бес амайбур гьикI ятIа???

 

ДИШЕГЬЛИЙРИН СУВАРИЗ


-Чахъ дидейрин сувар ава!
Чахъ бубайрин йикъар ава!
Бул ава чахъ суварар,
Недай хъуьтуьл афарар!

-Недай затІар бул жеда!
Къажгъан алай къул жеда!
Бул хьурай чаз суварар,
Лифер акваз цаварай!

-Шадвилер чаз бул жеда!
Суфрайрал чи зул жеда!
Мани галаз кьуьлерин,
Ким жеда шадвилерин!

-Гъетер акваз цаварай,
Бул жеда чаз суварар!
Бахтлувилер бул жеда,
Малкъарадин дул жеда!

           https://www.facebook.com/profile.php?id=100008564988590&fref=ufi  

Автор шаир Сажидин Саиджамалович
Ц1елегюнар
Шалбуздагъдихъ чинар авай кIвалерин, 
Ватан я вун мехъерринни мелерин. 
Лезги халкьдин берекатлу чилерин, 
Зияратдин макан я вун, ЦIелегуьн! 

КIуьд хуьруькай кIватIал хьана, шегьердиз 
Ухшар яз вун, атана къе бегьердиз. 
Билбилар кIватI жедай шад тир сегьердиз, 
Зияратдин макан я вун, ЦIелегуьн! 

Им тариф туш ийиз жедай акатай, 
Шейх Желилаз рагьмет авай чи патай. 
Камал-паша-генерал тIвар акъатай, 
Зияратдин макан я вун, ЦIелегуьн! 

Лайихлу тир рухваяр чахъ мад авай, 
Ибадуллагь стха вуч тир, ад авай! 
ПIирен булах- Мекке-земзем яд авай, 
Зияратдин макан я вун, ЦIелегуьн! 

Жегьил-жаван, рушар алван, бул авай, 
Гьава-атир дарман я вун, ЦIелегуьн! 
Гатфарни гад, берекатлу зул авай, 
Муьгьуьббатдин харман я вун, ЦIелегуьн! 

Сажидина, вал рикIивай ашукь яз, 
Хас тир тариф авуна къе ачух яз. 
Меркез хьтин хуьр дуьзмишай тамлух яз, 
Адалатдин макан я вун, ЦIелегуьн!

         

                       Зун лезги я.

Зун лезги я. Зи диб, зи ирс я рик1ин дамах,
Къавкъаз дагълар, туьнт лезги кьуьл, Шарвили даях.
Пад жеда рик1 гьалтай ч1авуз са бязи алчах,
Чилериз фий халкьдал леке гъидай лезгияр.

Ширин мецин ч1алахъ хьана, гадарна Кьуркьан,
Саникайни хьанач къе чаз, квахьна диб накьан.
Гьинва дамах, гьинва намус, лайихвал кьакьан,
Вилер мич1на гележегдихъ фидай лезгияр!?

Чи бубайри хвейи пак чил гьик1 хьана кьве пай?
Чи девлетар, тарих, эдеб физва къе гарай.
Низ ван атуй чилин т1алдин… суза я гьарай,
Стха течиз варлу мирес чидай лезгияр!

Усал акваз саймиш тийиз виняй жуванбур,
Пачагьарни ханар-беглер к1андай патанбур,
Чи дин, чи кьин, ахни намус тирни тапанбур,
Жув ак1ахьиз, чарадаз ник гуьдай лезгияр!?

Чун чи чилел иеси туш, гъейрид я панагь,
Я чахъ пачагь хьанач жуван, я хьанач Аллагь.
Вуч фад чна кьабулначни гьарамни гунагь,
Гьиниз фена лезгивал чи (и)видай лезгияр!?

Меслят такваз сада садаз гуда тагькимар,
Сирер садна уртах са кар тежез мягькемар.
К1уф вирт1еда, тум кьарада авай гьакимар
Эхна яхун кьамал кьуна хуьдай лезгияр!

Чаз чи руьгьдин, чи инсанрин къадир чиз амач,
Сада лагьай гаф муькуьдан япуз физ амач,
Бубани хва – чпи чпел дамах гъиз амач,
Чарадазни жуван хзан гигидай лезгияр!

Лезгидин гаф, лезгидин кьин к1еви туширни?
Шергир, Ваче, Гьажи Давуд лезги туширни?
Чак квайдини бес гьабурун иви туширни?
Къарагъ к1вачел, бубайрин т1вар хуьдай лезгияр!

1985.         Фейзудин Нагиев

Кевчибег
 
Гатун юкъуз кавал галаз къуьнерик,
Циригъуьлдал вякь ягъзавай кевчибег
Вуж ягъада вуна ийизвай хъуьрерихъ,
Лапаткадал вякь ягъзавай кевчибег.
 
Муьхцегалда кацин нагъвар нед лугьуз ,
Алцурармир керекуьлдиз къвед лугьуз.
Ягълу т1уьрт1а чандиз зиян жед лугьуз,
Шурвадаллай рякь ягъзавай кевчибег.
 
Ц1увад хуьре ц1увад пупан к1вал аваз,
Ви т1варцихъни къанни ц1уд аял аваз.
Гьалал хьурай ви чанда авай акьул ваз,
Йикьни шуван к1вале авай кевчибег
Аллагьди хуьй вун хьайила т1амада,
Лап вилик квай гамиш к1ел хьиз аквада.
 
Писни хъсан лугьуда и арада,
Шаламриз мазь ягъзавай кевчибег.
Профессор ваз ви патаг зат1ни туш,
Академик кт1ай бурандин падни туш,
Абурун патаг вун аджик1адин ч1ат1ни туш,
Акьван чирвал келеда авай кевчибег .
 
 
 

 

Миграгъриз хтайла лагьай чIал

 

Куьне завай хабар кьазва, хуьруьнбур:
- Мардали, вуч хабар ава Къубада?
За квез лугьун заз акурвал, хуьруьнбур:
- Къиздирмадин цIаяр ава Къубада.

Кесиб инсан кесиб язва вирина,
Девлетлуяр ава чпиз кефина,
Мардалидин рикI цIразва дердина:
Гишинбурун сувар ава Къубада.

Кесиб синиф акъатзавач фитедай,
Девлетлуйрин физвач абур вягьтедай,
Дуьнья я им икI чIур хьанвай сифтедай,
Чи пай квачир ракъар ава Къубада.

Кавалар цваз гьисабзава кIвал-уба.
Мад Къубадиз хъфин ийизва туба,
Куь Мардали хтанва гваз буш турба,
Такурбуруз сувар ава Къубада.

Мерд-Али

Хайи хуьре

Хайи хуьриз хъифенвай зун мукьвара,

Гьатай хьиз я заз зи руьгь терс кьац1ара.

Агъавалариз авай ана бушвили,

Квахьайда хьиз берекатар нушвилин.

 

 

Кимер – ич1из,рекьер- ич1из,регъв-ич1из,

Мезре – ич1из,Мазар – ич1из,Мегъв – ич1из..

Шумуд буллах,квахьна ч1варах,кьурана,

Ичерин багъ хьанвай хьиз тир вирина.

Шумуд къапу,бине хьана вергерин,

Ви кам мегер хъфидайни виликди,

Таквазмайла са дак1арни шерикдиз…

 

 

Санай суьруь, санай нехир экъе1из.

Аквадай тир серт булутрик экеч1из.

Лиферикни вили жедай наварал

Девдевар кьван хквезмачни аваран?

Гьик1 лугьуда девран ина гурзава,

Къалгъанрик квай рат1ра мефт1ер курзава…

 

 

Гьинай ят1а азан яна миск1инди,

Са къариди уьгьуь яна четиндиз,

Са къужади пис экъуьгъна тенбекдиз,

Элуькьай киц1 ягъиз ялгъуз демекдиз.

 

 

Санай перцин ван акъатна къван гатай,

Дере рахай хьиз хьана заз,чан хтай…

Ац1ай яйлух цуькверани векьерай

Вилер алаз авай яргъал рекьерал:

 

 

Куьн гьинава фейи кьванбур хурай зи?

Ни кьванни квез хквезмачни ч1урай зи?

Гьакьван агъул хьанвани бес ятар зи?

Куьн гьинава, зал чарх ягъай картар зи?

Гьакьван усал зат1 яни зи кьакьанвал?

За веледриз авурди туш так1анвал!

Къванят1ани,зал дагълагьай т1вар ала!

Йифер-йикъар,зал дат1ана зар ала!

Зун – зиярат,зун – чан алай мелгьем я!

Мелгъуьнривай муьт1уьгъжеч зун – мягькем я!

Мус хтайт1а захъ рухвайриз тав ава!

Захъ дере хьиз,гьакьван гегенш цав ава!...

 

 

Рахазвайди масад тушир,хуьр тир зи,

Рик1е даим авай ч1ехи п1ир зи,

Ч1ехи вац1 тир,Яру дагъ тир,Шалбуз тир…

Гьик1 лугьудай абур анна ялгъуз тир?

Абур санал ала Муг хуьз Ракъинин!

Ватандингум ширин тирди якъиниз…

 

 

 /Мердали Джалилов/

Copyright MyCorp © 2019